大戶 vs 散戶

稍為了解投資銀行業的網友可能會問，投行的本業是做財務顧問，本來不要太多的資金，點解市場資金緊缺時，投行好像過不到日子，甚至有倒閉之險呢？其實今天 的投資銀行，它們已經變作異型生物，本業財務顧問，只佔他們部份生意，另外它們發行大量的衍生工具，就有資本要求；他們做財務顧問的同時，又會提供融資， 即係借埋錢俾客戶收購，做埋金主；而投行最神秘、又最賺錢的業務，就是他們自己的坐盤投資，我地好多時講的外資大戶，並不是指對沖基金，如索羅斯這類國際 大鱷，並不是經常盤據香港搵食，反而各大投行的坐盤交易，才是香港這種新興市場的要角。

炒股是一個資本遊戲，當某些大戶資金極為龐大，並且環球操作時，根本運用資金就可以左右大局。就例如８、９月時的市況，那時美股只是炒上落市，但港股卻反 覆向下炒，如果你話資金流出亞洲是因為美元轉強，那麼資金又為何要流出和美元掛鈎的香港，你唔好問點解，有錢那個人就決定你股市的升跌。這就解釋了出現金 融核心融解的美國股市，可以跌得少過亞洲股市，一方面固然因為這些新興市場波動大啲，但更重要的是資金流向左右大局。

投行有１元資本，至少可以借大到５元、１０元咁去炒，如果在自己的體系走幾轉，衍生效應更大。炒股唔係睇眼光，係睇實力，實力大者好易贏。網友阿Ray問 我外資大戶睇乜嘢決定點樣炒作，我就話佢地係睇住對手嚟炒，佢地o既對手係本地的散戶，包括一些巨型散戶。佢要沽期指，要有人買期指接佢貨，一買一賣，才 成交易，如果佢一沽就有足夠對手接佢貨，就唔使搞太多大龍鳯，沽夠倉就插，插到你阿媽都唔認得，插到你投降，到你信心崩潰連倉底貨都沽埋，佢就搵到對手， 因為跌夠佢要平淡倉就要做好倉，要有好多散戶成為佢對手去造淡才成，佢平完好倉就順手揸突，又造番好，再推高大市開展一浪反彈行情。所以早幾個月半年去估 大市會去到邊個位，估中者多數係運氣好，唔一定係眼光好，因為左右大市的大戶者係隨行就市，睇住對手來玩，你點會咁叻估到佢地一舉一動呢？

有好多美國投資高手著書立說，話唔好信陰謀論，唔好信有人造市，我估呢個講法在美國或者啱，在香港這種小市場就唔係幾啱，人地用盡資金槓桿，富可敵國，要玩起你香港個市，話都無咁易。

而家話兩大投行轉埋做銀行，可以收存款充實資產，長線而言，從資本角度，它們會加強而非減弱，不過這個做法有點以遠水救近火之感，或許美國財長保爾森出此一著，只為加強高盛和大摩的吸引力，俾多啲子彈佢地去集資。

雖然投行全部變成銀行後，它們可能要間接受銀行業的較嚴格監管，不如以住那樣可以自由行動。不過你有張良計，佢有過牆梯，投資銀行家智慧超班，未來左右亞洲股市大局的，相信還是這些美資大行。